Fogueira de San Xoán

Que fogueira a deste ano!
Vese que xa temos moita práctica e como veña unha boa noite- que veu- a fogueira arde tan lixeira que todos quedamos pasmados a mirar para ela.
Pola  tarde fixemos o meco- quedou precioso- e logo,  a pouco un grupo de "voluntarias da motoserra", colléronlle gusto ao traballo e caseque deixan o plataneiro sen polas e as xestas en perigro de extinción, pero pagou a pena....

E cando a fogueria veu a menos as pandereteiras pequenas puxéronse a cantar, non unha senón unha morea de cantigas que deixaron abraiados a doos, e aos seus pais e nais cheos de fachenda.

Actividades de verán

San Xoán

Non podiamos deixar de celebrar a noite de San Xoán e o sábado quedamos na escola pola tarde para facer o meco. Geni, como todos os anos, trouxonos a roupa e de Digna era a palla para enchelo. Fomos ao "Avelino" a polos petardos que sempre leva dentro e entre uns e outros armamos un bo meco que levamos ata Chan de Vide no tractor de Celestino e alí, logo de montar a fogueira coa leña e madeira que os viciños foran deixando, Bruno subíu ás escaleiras para colgar a "Delfino" ben alto.
O traballo viusenos enriba e non nos deu tempo de ir á procura das herbas de san xoán, para facer o cacho, así que é posible que a pel das nosas preciosas facianas tome nota delo. Xa veremos.

Ceamos na carballeira de A Chan e ás 12 en punto prendimos lume a fogueira.

Antes, todos os nenos e nenas, e algún que outro "infiltrado", puxeramonos en roda arredor dela para cantarlle:

Delfino vai en coche
Delfino en coche vai
Delfino vai en coche
á fogueira de San Xoán.

Despois, cando o lume chegou ata Delfino e levouse con el todo o malo que fixemos, que sentimos, que pasou neste ano, choramos e berramos pero tamén aplaudimos por estar  xuntos cantando e bailando na noite de San Xoán.




E tocamos as pandeiretas e as gaitas, e bailamos e cantamos mentras esperábamos que chegase a mañán da noite de San Xoán.

Herbas de San Xoán e fogueira

Onte polo serán, que hoxe estaremos moi ocupadas preparando a festa e a fogueira, quedamos para ir a procura das Herbas de San Xoán , e foi traballo doado porque nun cantiño xa tiñamos collidas sete herbas. Non dabamos atopado a herba de san xoáon, e sustituímola por xesta. Había xa poucos estralotes, pero sorprendentemente moito fento macho. O que non había por ningures era malva, Sita dixera que nas Puntaleiras, onda a ponte románica ela vira algunha , pero non nos pagou a pena ir ata alá a por ela. Fixemos unha morea de ramos, primeiro os nosos, claro, pero logo decidimos facer moitos máis para regalalos ás que non viñeron.

Ah! e cando xa tiñamos os ramos feitos, de volta á casa, apareceu a herba de san xoán. E que nesta parroquia está visto que hai de todo. E mañán pola mañán xa veredes como vai chamar a atención a frescura da nosa piel e o ben que sabemos manter á raia o mal de ollo e os feitizos traidores.

Só tivemos un problema , que quedou en nada gracias como sempre a solidariedade vidense. O Concello non nos daba permiso para facer a fogueira porque non tiñamos un Seguro de Responsabilidade Civil para cubrir a festa. Enteradas as mulleres da Comisión de Festas, que si teñen este seguro, ofrecéronse para solicitar elas o permiso e poder seguir adiante. Gracias. Se non chega a ser por vós, este ano quedabamos sen fogueira - no Concello fixéronnos pagar 18 euros de tasa, pero, será por cartos!-

As herbas de San Xoán

Como en nada estamos en San Xoán, deixámosvos o noso Boletín das Herbas de San Xoán, así non tedes disculpa paro non saír o martes, 23 de xuño, á noitiña á procura delas. Logo pola mañán lavas a cara e o teu cutis, xa sabes, quedará ¡¡¡¡¡DIVINO!!!